Marché pour la fonte de quatre cloches destinées à l'église Saint-Leu-Saint-Gilles.
http://data.archives-nationales.culture.gouv.fr/recordResource/041101-c1p6rdid4a4r--s3k6y6zgom54 an entity of type: RecordResource
Marché pour la fonte de quatre cloches destinées à l'église Saint-Leu-Saint-Gilles.
xsd:date
1582-04-03
3 avril 1582
rdf:XMLLiteral
Extrait du contenu :
' Furent presens en leurs personnes Nicolas Delaistre et Jehan Jacques, fondeurs de cloches, demeurant à Clainchan, près Chaulmont en Bassigny, estant de present en ceste ville de Paris, logez rue du Bourg-l'Abbé, à l'enseigne du lyon d'or, lesquelz confessent avoir promis et promectent chacun d'eulx seul et pour le tout, sans forme de fidejussion, division ne ordre de discussion de droitct, renonçant aux bénéfices et expéditions d'iceulx droictz, a noble homme Maistre Jehan Bouchart, examinateur et commissaire de par le roy nostre sire ou Chastelet de Paris, honorables hommes Nicolas Duhamel, André Delisle et Nicolas Bernard, marchans et bourgeois de Paris, a present marguilliers de l'œuvre et fabricque de l'église Messieurs Saint-Leu-Saint-Gilles, fondee à Paris rue Saint-Denis, a ce presens, stippulans et ce acceptans pour ladicte œuvre et fabrique, de faire et fondre par lesdictz Delaistre et Jehan Jacques bien et deuement pour icelle eglise quatre cloches neufves sonnantes et accordentes au ton de fa, mi, ré, ut, des grosseurs et ainsy qu'il est requis et necessaire, de la sorte qu'elles pourront entrer au beffroy qui est a present au clocher de ladicte église.
Et pour ce faire lesdictz Delaistre et Jacques prenderont et seront et seront tenuz enlever pour estre emploié a confection desdictes quatre cloches neufves les quatre vielles qui sont a present audict clocher, et y employer tout le mestail neuf que lesdictz marguilliers leur fourniront et qu'il sera besoing pour la confection d'icelles cloches, lesquelles seront faictes et fondeues derrière ladicte eglise au lieu que lesdictz marguilliers trouveron plus commode.
Et a ceste fin lesdictz Delaistre et Jacques seront tenuz de faire faire toutes les démolitions qui seront necessaires pour la descente desditctes vieilles cloches, ensemble faire faire a leurs despens tous les restablissements et choses qu'il conviendra pour prendre et monster audit clocher lesdictes cloches neufves, comme la charpenterye, maconnerye, eschaufaiges, couverture et generallement toutes choses que besoing sera a l'effest dessusdict et pour rendre lesdictes cloches neufves montees, pendues, attachees, bien conditionnees, sonnantes, accordantes, deuement faictes et parfaictes au dit d'ouvriers et gens a ce congnoissans en sorte que lesdictz marguilliers ne seront tenuz fournir aulcune chose ne faire aulcun fraiz a cause de ce synon le mestail neuf qu'ils fourniront comme dic est, et ou ilz voudroient eslargyr le beffroy dudict clocher ne sera aux depens desdictz Delaistre et Jacques ains de ladicte œuvre. Pareillement faire fondre par lesdictz Delaistre et Jacques les palliers pour lesdictes cloches neufves, fournir les bastains d'icelles de grosseurs et longueurs competentes et generallement tout ce que besoing sera le tout et bien et deuement retablyr et parfaict comme dict est.
A faire lesquelles cloches et ouvrages lesdictz Delaistre et Jehan Jacques promectent commencer dedans quinze jours prochains, continuer a y besongner sans discontinuer et les rendre faictes et parfaites bien et deuement ainsy que dict est en dedans le quinziesme jour du moys de may prochain, auparavant que de monster audict clocher lesquelles cloches neufves lesdictz fondeurs promectre (sic) les faire mectre et pendre sur chevalletz de bois au lieu qui leur sera ordonné par lesdictz marguilliers en ladicte eglise pour la benediction d'icelles cloches et les faire monster audict clocher et faire le tout deuement restablyr d'en dedans deux ou trois jours apres ladicte benediction faicte.
La dicte presente promesse et marché faictz moyennant la somme de cent seize excuz deux tiers escu d'or soleil pour tous lesdictz ouvrages et fraiz dependans d'iceulx que lesdictz marguilliers oudict nom seront tenuz et promectent bailler et paier ausdictz Delaistre et Jehan Jacques ou au porteur etc, assavoir cinquante excus soleil lorsqu'ilz auront commencé a faire lesdictz ouvraiges et le parfaict paiement après que tous lesdictz ouvraiges seront entièrement faictz, .parfaictz et le tout deuement restably, mesmes après qu'ilz auront faict combler la fosse et place ou seront fondeues lesdictes cloches, et pour plus grande seureté de toutes les promesses et obligations susdictes faictes par lesdictz Delaistre et Jacques, ilz promectent chacun d'eulx seul et pour le tout sans division, comme dessus, de fournir et bailler ausdictz marguilliers qui s'oblige avec eulx et chacun d'eulx seul et pour le tout sans forme de fidejussion, ensemble ordre, droitc de discussion et de fidejussion et de ce en fournir et bailler lectres et obligations en forme deue et authentique passee soubz le scel de la prevosté de Paris ausdict marguilliers dedans ledict temps de quinze jours prochains et auparavant que de leur bailler aulcuns deniers sur ledict pris et pour l'execution de ces presentes lesdictz Delaistre et Jacques ont esleu leur domicile irrevocable en ceste ville de Paris audict hostel du lyon d'or en ladicte rue du Bourg l'Abbé, auquel ilz veullent, consentent et accordent que tous adjournemens, requestes, sommations, significations et aultres exploitz de justice qui y seroient faictz pour raison de ce soient de pareil effect, force, vertu que si faictz estoient en parlant à leurs personnes propres ; promectant etc, obligeant chacun en droict soy lesdictz marguilliers oudict nom et lesdictz fondeurs chacun d'eulx seul et pour le tout sans division, corps et biens, renoncent etc et encore iceulx fondeurs aux dessusdictz benefices.
Faict et passé es estudes notaires soubzsignez double, l'an V c quatre-vingtz deux, le mardi tiers jour d'avril apres midy, lesdictz marguilliers et ledict Jean Jacques ont signé la presente et ledict Delaistre y a fait sa marque pour son seing dont il a acoustumé user.
Bouchard - Delisle - Jehan Jacques- Hamel - Benard - marque dudict Delaistre - Haguenyer (notaire) - Chazeretz (notaire).
Origine de l'information :
La musique au XVIe siècle, 131 actes concernant les musiciens dans les minutes du notaire Jean Chazerets de 1577 à 1599, par Madeleine Jurgens, 1975 (dactylogramme entièrement dématérialisé ; voir contexte dans le Plan d’orientation général - Notaires de Paris, guides thématiques du Minutier).
Date de création de la notice : 2011
Marché pour la fonte de quatre cloches destinées à l'église Saint-Leu-Saint-Gilles.