Association de quatre joueurs d'instruments pour sept années.
http://data.archives-nationales.culture.gouv.fr/recordResource/041167-c1p6sn94tl57--12if125f792ma an entity of type: RecordResource
Association de quatre joueurs d'instruments pour sept années.
xsd:date
1641-04-30
30 avril 1641
rdf:XMLLiteral
Autre(s) instrument(s) de recherche
Documents du Minutier central concernant l'histoire de la musique (1600-1650), par Madeleine Jurgens, tome I, Paris, Archives nationales, 1967, XVI-1054 p.
rdf:XMLLiteral
Extrait du contenu :
' Par devant les garde-nottes du roy nostre sire en son Chastellet de Paris soubzsignez, furent present en leurs personnes Jehan Guerin, François d'Arnodin, Anthoine Décréo, Pierre Camille, tous maistres joueurs d'instrument de musique à Paris, y demeurant, scavoir ledict Guerin faulxbourg Sainct-Germain-des-Prez, rue des Quatre Vents, parroisse Sainct-Sulpice, ledict Decréau, susdict faulxbourg, rue du Petit Lyon, ledict Camille aussy audict faulxbourg rue de Bussy et ledict Arnaudin place de Greve, parroisse Sainct-Jehan.
Lesquelz ont faict et accordé entre eulx ce quy ensuit : assavoir que chacquun d'eux a promis et promet de jouer ensemblement de l'instrument cy-après declaré, scavoir ledict Guerin des basse de viollon et ledict d'Arnodin des tailles de violon, et ledict Decreo et Camille des dessus dudict viollon; à l'effect de quoy ilz se sont ensemblement associez et associent à commencer icelle association vendredy prochain troisiesme jour de may an present mil six cens quarante-un et jusques à pareil jour de l'année que l'on comptera mil six cens quarente-huict.
Et veullent faire des associez jusques au nombre de sept et n'entrera aucun desdictz associez pretendus que tous les quatre n'en soient consentents et un seul empesche le tout.
Et s'associent ensemble tant au gain qu'ilz esperent faire qu'à la perte et autre fraiz et despence qu'il leurs conviendra faire, et, cepandant et jusque en l'année mil six centz quarante-huict se trouveront ensemblement tous lesdictz associez chacun vendredy de chaccunne sepmaine depuis Pasque jusqu'à la Sainct-Remy à trois heures attandant quatre après midy et depuis la Sainct-Remy jusque à Pasque à deux heures attendant trois après midy et ce ès maisons desdictz associez l'un après l'autre et chaccun quatre vendredy. Et commencera chez le sieur Guerin et les autres en suyvant.
Et, en cas qu'aucun desdictz associez manque à ce (sic) treuver à l'heure comme il est dict cy-dessus, payera vingt sol tournoiz et ce pour chaccune fois qu'ilz manqueront à ce treuver èsdictes maisons.
Et est accordé qu'aucuns desdictz associez n'entissipera sur la partie de ses compagnons cy ce n'est pour le p[r]offit desdictz associez, et où aucun d'eux iroient au contraire payeront trente sol de poene.
Et, cy aucun d'eux fraude ces compagnons en aucune maniere que ce soit payera soixante livres aux autres compaignons et sera mis hors de la sossietté cy tous les autres consentent.
Et, en cas qu'aucun desdictz associez voulust se departir de la ditte sossietté payera à ses compagnons soixante livres tournoiz.
Arrivant qu'aucun d'eux manque ce treuver èsdictes maisons ou lieux pour jouer aux serenades et aubades et autre occasions après que l'on l'en aura esté ou envoyé adverty d'heure auparavant payera trente solz pour la premeire serenade ou aubade et dix solz pour chaccune des autres. Quy ne se trouverra à l'assiette de table des nopces, festinz et autres assamblées, estant adverty comme dessus payera trente solz tournoiz, et cy les premiers bransles sont dancez payera celuy ou ceux quy ne sy seront point trouvez vingt solz tournoiz aux autres.
Cy aucun d'eux reffuse à jouer lorsqu'il sera par eux appellé ne partagera poinct à l'occasion où ces compagnons joueront ains payera trois livres tournoiz pourveu n'y ait quelque cause legitimes.
Cas advenant que trois desdictz associez jouent trois ensemble, ils seront tenus de rapporter ce qu'ilz auront gaigné à leurs compagnons pour estre par eux esgallement partagé. Et, aussy, pendant le temps qu'ilz auront esté employez a jouer trois ensemble comme dessus, les autres seront tenuz de rapporter ce que chaccun d'eux seul pourra avoir gaigné pour aussy les partager esgallement, lequel gain sera par eux apporté le vendredy prochain; sinon feront apparoir le vendredy ensuyvant de leurs diligences ou à faute payera quarante solz tournoiz.
Aulcun desdictz associez ne pourra aller au champs pour jouer en cas qu'il y faillent des compagnons sans leur faire assavoir cy ilz y veullent venir ou non; et ne voullant y vedir, il luy sera permis d'en prendre ou bon luy semblera et où il ne advertiroit point, payera dix livres tournoiz.
Et, est accordé que cy chaccunne des partyes ne sache pas la sienne, de laquelle il doit jouer dans trois mois prochains, en ce cas il sera permis ausdictz associez de le mettre hors de ladicte association et un seul empesche le tout et encorres en cas que sy quelq'un deux viennent à tomber malade, à Dieu ne plaise, ne laissera pas de partager esgallement comme les autres, cy ce n'est maladie venerienne.
Toutes lesquelles conditions à peine cy devant declarées chacunes des partyes promettent entretenir et payer ainsy qu'il est cy-devant dict. Car ainsy, promettant etc, obligeant chacun en droict soy, renonceant, etc.
Faict et passé ès estudes l'an mil six centz quarante et ung, le mardy après midy trenteiesme et dernier jour d'apvril et ont lesdictes partyes signé, la presente minutte est subjette au scel, aux peines des eedictz et declarations du roy sur ce intervenuz.
GUERIN DECREO COUILLARD (notaire) DARNAUDIN CAMILLE CHARLET (notaire)
Origine de l'information :
Documents du Minutier central concernant l'histoire de la musique (1600-1650), par Madeleine Jurgens, tome I [études I à X, 1763 actes], Paris, Archives nationales, 1967, p. 410LII (instrument de recherche imprimé dématérialisé, certaines notices sont plus détaillées dans la version intégrale accessible en ligne par la rubrique 'Autres instruments de recherche', voir contexte dans le Plan d’orientation général - Notaires de Paris, guides thématiques du Minutier).
Date de révision : 2011
Date de création de la notice : 2009
Association de quatre joueurs d'instruments pour sept années.