Vente de caractères de musique par Jacques de Senlecque à son fils.
http://data.archives-nationales.culture.gouv.fr/recordResource/041215-c1p6t0zz803v--19eyleoue5q91 an entity of type: RecordResource
Vente de caractères de musique par Jacques de Senlecque à son fils.
xsd:date
1637-09-26
26 septembre 1637
rdf:XMLLiteral
Autre(s) instrument(s) de recherche
Documents du Minutier central concernant l'histoire de la musique (1600-1650), par Madeleine Jurgens, tome I, Paris, Archives nationales, 1967, XVI-1054 p.
rdf:XMLLiteral
Extrait du contenu :
'Fut present en sa personne honnorable homme Jacques de Sanlecque, l'aisné, marchant libraire imprimeur et fondeur de lettres et caracteres pour l'imprimerie à Paris, y demeurant, rue du Murier, parroisse Sainct-Estienne-du-Mont, lequel, à cause de son aage qui est de plus de soixante-six ans, a dict et declaré qu'il ne peult plus que bien difficilement travailler de sadicte vacation de graveures de caractaires pour l'imprimerye, d'aultant que, pour faire les poinçons, matrices et moulles necessaires audict art, il convient avoir très bonne veue et agir avec ung travail viollent et que pour la fonte des lettres de l'imprimerye, il convient faire l'aliage de mettaux et mineraux necessaires entre lesquelz entre quantité d'antimoyne, dont les fumées et vapeurs venimeuses incommodent grandement sa santé. C'est pourquoy, pour son soullagement, il a retiré des estudes Jacques de Senleques, son filz, pour lui apprendre sadicte vacation, affin de lui estre ung soullagement en sa vieillesse. Pour ces causes et autres de sa bonne vollonté a recongneu et confessé avoir vendu ceddé, quitté, transporté et dellaissé audict Jacques de Senlecques, le jeune, son filz, demeurant avec luy, susdicte rue, à ce present et acceptant, tous les poinçons, matrices, moulles et autres ustancilles servant audict art et qui sont contenuz et declarez en l'inventaire faict après le decedz de deffuncte Girarde du Bray, sa femme, et à luy adjugez par sentence du vendredy deuxiesme janvier mil six cent trente-deux, ainsy qu'il appert par le procès-verbal de vente qui en a esté faict, que tous les autres poinçons, matrices et moulles de lettres et caracteres de ladicte imprimerye qu'il a faict depuis ledict inventaire, tant lui seul qu'avec ledict Jacques de Senleque, son filz, consistans lesdictz nouveaux caracteres faictz depuis ledict inventaire jusques à ce jour en une pettite musicque pour les airs, avec sa frappe de matrice justiffiées et ces cinq moulles; item, une moyenne pour musicque de consert, avec sa frappe de matrice justiffiée et ses cinq moulles; item, une grosse pour musicque de messes qui ne consiste qu'en quarente poinçons completz; item, une petitte lettre appellée parisienne, avec sa frappe, matrice justiffiée et son moulle; item, une petite notte de plainct-chant qui porte ses reglais avec sa frappe de matrice justiffiée sur cinq moulles; item, trois autres moulles neufs dont l'un sert au gros parangon et les deux autres ont servi au caractere faict pour le bureau des cartes; item, les petittes capitales tant de petit canon que gros parengon frappée et justiffiée.
Ceste presente vente et transport faictz moyennant la somme de six mil livres tournois pour le payement de partye de laquelle somme de six mil livres tournois ledict Jacques Senlecque filz, tant en son nom que comme ayant droict par transport de Maistre François de Sanlecque, son frere, huissier en parlement, par acte passé par devant les notaires soubzsignez, a quitté et deschargé quitte et descharge par ces presentes ledict de Senlecque, son pere, de la somme de quatorze cens une livres deux solz quatre deniers quy est deue ausdictz Maistre François et Jacques de Senlecque, filz, pour leurs partz et portions de la somme de quatre mil deux cens livres dix-huict solz tant en principal qu'interest par la succession de deffuncts Toussainct du Bray et Antoinette Saubois, sa femme, par plusieurs contractz, sentences, et obligations et pour quoy ledict Jacques de Senlecque, pere, s'estoit obligé comme respondant, principal debiteur et payeur pour lesdictz du Bray et sa femme envers lesdictz de Senlecque, ses enffans, par devant Marreau et Charles, notaires au Chastellet de Paris, le vingtiesme may mil six cens trente-six, pour les causes et selon que le contient au long ladicte obligation passée par devant lesdictz notaires, laquelle, dont il n'a poinct de minutte, ledict de Senlecque filz èsdictz noms a presentement baillé et mis ès mains dudict de Senleque pere, le subrogeant à ce regard, en son lieu, droictz, ypothecques, noms, raisons et actions sans garentye de restitution de deniers quelzconques pour en avoir par ledict de Senlecque, pere, son recours allencontre de la succession desdicz du Bray et tous autres fors que contre ledict sieur Senleque comparant et son ceddant, et quant ausdictz contractz, sentences et obligations ledict de Senlecque pere recongnoist les avoir en sa possession à cause de ce qui luy est deub de son chef et oultre moyennant la somme de quatre mil cinq cens vingtz dix-huict livres dix-sept solz huict deniers que ledict de Senleque, pere, en confesse avoir eu et receu presentement comptant de sondict filz en pistolles et monnoye, le tout bon et ayant de present cours, presens les notaires soubzsignez, dont ledict de Senleque pere s'est tenu content et en quitte sondict filz et tous autres recongnoissans ledict de Senleque filz que sondict pere luy a faict l'entiere deslivrance de tous lesdictz poinçons, matrices, moulles et ustancilles dessus declarez, dont il s'est tenu content et en quitte sondict pere et tous autres. Et, en consideration de la presente, ledict de Senlecque, pere, promet à sondict filz de faire dedans le plus bref temps que faire se pourra la frappe des matrices de la grosse musique de messe, ensemble faire plus de poinçons sy besoing est, les frapper et justiffier, comme pareillement graver les poinçons des moyennes et grosses nottes, frapper les matrices d'icelles et du tout en faire les moulles sans en payer par luy aulcune chose à sondict pere qui fournira de tout ce qu'il conviendra pour faire lesdictz poinçons, moulles et matrices. Promettans etc, obligeans chacun en droict soy, renonceans etc.
Faict et passé à Paris en l'estude etc, l'an mil six cens trente-sept, le vingt-sixiesme septembre après midi et ont signé :
J. de SENLECQUE J. de SENLECQUE LEVESQUE (notaire) BOUCOT (notaire)
Origine de l'information :
Documents du Minutier central concernant l'histoire de la musique (1600-1650), par Madeleine Jurgens, tome I [études I à X, 1763 actes], Paris, Archives nationales, 1967, p. 857 (instrument de recherche imprimé dématérialisé, certaines notices sont plus détaillées dans la version intégrale accessible en ligne par la rubrique 'Autres instruments de recherche', voir contexte dans le Plan d’orientation général - Notaires de Paris, guides thématiques du Minutier).
Date de révision : 2011
Date de création de la notice : 2009
Vente de caractères de musique par Jacques de Senlecque à son fils.