Association de six joueurs d'instruments pour huit années.
http://data.archives-nationales.culture.gouv.fr/recordResource/041327-c1p6tzv8vz7f-1enr7w0oo2vcu an entity of type: RecordResource
Association de six joueurs d'instruments pour huit années.
xsd:date
1626-08-21
21 août 1626
rdf:XMLLiteral
Autre(s) instrument(s) de recherche
Documents du Minutier central concernant l'histoire de la musique (1600-1650), par Madeleine Jurgens, tome I, Paris, Archives nationales, 1967, XVI-1054 p.
rdf:XMLLiteral
Extrait du contenu :
' Furent presens en leurs personnes Baptiste Jolicoeur, Guillaume Duneau, Guillaume Le Sac, François Joubert, Hierosme Amand et Emé Amand, tous maistres joueurs d'instrumens à Paris, y demourans, lesquelz se sont volontairement et librement associé et associent ensemblement du jour d'huy jusques à huict ans, pour par eulx participer au gain qui en proviendra selon et ainsy qu'il s'ensuit.
Et ont accordé que pour leur jeu ilz tiendront scavoir ledict Jollycoeur la basse de violon et basse de hautbois, ledict Duneau taille de cornet et de violon, ledict Sac dessus de cornet et de violon, ledict Joubert les mesmes parties, ledict Hierosme Amand de basse de violon et hautlbois, et ledict Edmé Amand de haulte contre de violon et cornet, sans que l'un ou l'aultre desdictz associez puisse entreprendre de jouer autre partie à peine de six livres tournoiz pour chacune fois.
Et pour concerter entre eulx seront tenuz eulx tous de se trouver le vendredy de chacune sepmaine pendant le temps de leur association tour à tour en la maison de chacun d'eulx et ce à l'heure de deux à trois heures depuis Pasques jusques à la Sainct-Remy et depuis ledict jour Sainct-Remy jusques audict jour de Pasques precizement à l'heure de deux heures à peine de payer par le contrevenant pour chacune fois qu'il aura manqué à se trouver à l'heure seize solz tournoiz.
Ne pourront aussy aucun des dessusdictz associez prendre qui que ce soict pour jouer avec eulx sinon lorsque les aultres de leur association seront empeschez ailleurs sur peine de paier six livres par chacune fois.
Et seront tenuz rapporter fidellement à la masse et au commung le vendredi de chacune sepmaine le gain qu'ilz auront faict sur peine au contrevenant de payer pareilz six livres tournoiz.
Item, seront tenuz les dessusdictz de se trouver aux heures dictes aux haubades sur peine de vingt solz et aux assiettes de table aussi à peine de vingt solz et pour les mariages pareilz vingt solz.
Item, quand trois desdictz associez joueront et sonneront ensemble rapporteront leur gain à la communaulté pour le partager entre eulx esgallement.
Ne pourront lesdictz associez ne aulcun d'eulx se departir de la presente association sans le mutuel consentement de leur compagnie à peine de cinquante livres tournoiz que chacun contrevenant sera tenu payer sans aucun contredict à ceulx qui la vouldront tenir et entretenir.
Et advenant que aucun desdictz associez fut detenu par maladie ou autre accident legitime qui l'empeschast de se trouver et aller avec ses compagnons, les autres seront tenuz luy rapporter sa part et portion jusques ad ce qu'il soit venu à convalescence.
Et seront aussy tenuz lesdictz associez de dire et declairer chacun vendredi en leur assemblée les marchez qu'ilz auront faictz et arrestez à peine de six livres tournoiz aussy pour chacune foys.
Ne pourront pareillement lesdictz associez ne aucun d'eulx jouer sur le theatre de Montdor et Tabarin ou autre theatre semblable sous peine aussy de cinquante livres tournoiz et quand ilz jourront aux champs le gain ne se raportera poinct.
Car ainsy, etc, promectant etc, obligeant chacun en droict soy corps et biens, renonceant etc.
Faict et passé à Paris ès estudes des notaires soubzsignez, l'an mil six cens vingt-six le vingt-ungniesme jour d'aoust après midy; lesdictz Jollicoeur, Duneau et Joubert ont signé et les autres ont declaré ne scavoir escripre ne signer.
B. JOLLYCOEUR François JOUBART CHARLET (notaire) G. DUNEAU HUART (notaire)
Origine de l'information :
Documents du Minutier central concernant l'histoire de la musique (1600-1650), par Madeleine Jurgens, tome I [études I à X, 1763 actes], Paris, Archives nationales, 1967, p. 392XXXVII (instrument de recherche imprimé dématérialisé, certaines notices sont plus détaillées dans la version intégrale accessible en ligne par la rubrique 'Autres instruments de recherche', voir contexte dans le Plan d’orientation général - Notaires de Paris, guides thématiques du Minutier).
Date de révision : 2011
Date de création de la notice : 2009
Association de six joueurs d'instruments pour huit années.