Marché pour l'impression des oeuvres de Ronsard par Nicolas Buon.
http://data.archives-nationales.culture.gouv.fr/recordResource/041364-c1p6uakpstln-14bskn48ncasa an entity of type: RecordResource
Marché pour l'impression des oeuvres de Ronsard par Nicolas Buon.
xsd:date
1617-04-25
25 avril 1617
rdf:XMLLiteral
Autre(s) instrument(s) de recherche
Documents du Minutier central des notaires de Paris, Ronsard et ses amis, par M. Jurgens, à partir des dépouillements de X. Pamfilova, Paris, Archives nationales, 1985, 488 p.
rdf:XMLLiteral
Extrait du contenu :
Par devant Bon Cothereau et Mathurin Perier, notaires du roy nostre sire au Chastelet de Paris, soubzsignez, fut present en sa personne noble homme Maistre Philippes Gallandius, principal du college de Boncourt, fondé en l'université de Paris, y demeurant, auquel, comme nepveu de feu Maistre Jan Gallandius, a esté par la Magesté du roy à present regnant, continué les grace, permission et charge de reprendre toutes et chacunes les OEuvres et poesies de deffunct Pierre de Ronsard, vivant gentilhomme vendosmois, tant imprimées que à imprimer, pour y adjouster celles qu'il a encores trouvez parmy les papiers de son dict oncle, pour puis après les faire de nouveau r'imprimer et mettre en lumiere par tel libraire qu'il luy plaira eslire et choisir, avec très expresses inhibitions et deffences, à tous autres libraires, imprimeurs et autres personnes de quelque estat, qualité et condition que ce soient de ce royaume, de n'imprimer ou exposer en vente doresnavant aucune desdictes oeuvres de Ronsard, soit en la sorte et maniere qu'elles ont esté ci-devant imprimées ou seront cy-après, si n'estoit du vouloir et consentement dudict Philippes Galendius ou de celuy auquel il en aura remis et baillé sa permission, soubz les peines et ainsi que le contiennent plus au long les lectres patentes de Sadicte Magesté, données à Paris le vingt-deuxiesme jour d'avril mil six centz dis sept, signées Perrochel et scellées du grand sceau de cire jaune.
Lequel dict sieur Philippes Galandius, suivant ledict pouvoir et permission à luy donnée par Sa Magesté, desirant, ainsi que sondict oncle a faict, gratifier celuy qui avoit esté eslu et choisy par luy, de son bon gré et franche volonté, sans aucune contraincte si comme il disoit, recognut, confessa, recognoist et confesse avoir permis et permet à honorable homme Nicolas Buon, marchand libraire à Paris, à ce present et acceptant pour luy et les siens et luy a donné charge et pouvoir de reprendre toutes les oeuvres dudict deffunct Pierre de Ronsard, gentilhomme vandosmis, tant jà ci-devant imprimées que à imprimer, ainsi qu'il advisera bon estre pour le mieulx pour les faire encores par ci-après imprimer pour luy et à son proffict tant de foys et en telle forme et lettre que bon luy semblera pendant le temps et terme de douze ans entiers et consecutifs à commencer de ce jourd'huy. Pendant lequel temps et terme de douze ans ledict sieur Galendius veult et entend que ledict Buon seul et non autre jouisse du pouvoir et permission portée par les (lettres) patentes du roy mentionnées cy-dessus, et que nul autre le puisse faire sans son consentement ou de ses ayans cause à peine de confiscation, d'amende, despens, dommages et interestz dudict Buon et autres peines portées par lesdictes lettres patentes, nonobstant autres permissions (...) le tout suivant et conformement au contenu desdictes lettres patentes ci-dessus, qui demeureront en leur force et vertu pour le regard dudict sieur Gallandius pour, après les douze ans expirez, user et jouir par luy du benefice contenu et porté par icelles.
Consent et accorde ledict sieur Gallandius que ledict Buon fasse icelles patentes et lettres de privilege et permission signifier et faire faire les deffences y contenues à tous libraires et imprimeurs et autres qu'il voudra et appartiendra, en fasse et dispose à sa volonté, se pourvoye encontre les contrevenantz, en reçoive les profitz, revenuz et emolumentz, comme il verra bon estre pour raison, sans aucun contredit ny empeschement, car ainsi l'a voulu et le veult ledict sieur Galendius, à la charge que ledict Buon ou ses ayans cause sera tenu de faire imprimer dedans le temps et terme de trois ans prochainement venantz lesdictes Oeuvres de Ronsard en grand volume in-folio et beau caractere, ainsi qu'ilz ont esté déjà faictes par ci-devant. Et où dedans ledict temps de trois ans ledict Buon ou ses ayans cause ne les feroit imprimer in folio, comme dict est, il sera descheu de l'effect du present transport et cession que ledict Galandius pourra cedder à autre, si bon luy semble. Car ainsi a esté accordé entre lesdictz sieur Galandius et Buon à ce present et acceptant, promectant etc, obligeant etc, renonceant chacun en droict soy.
Faict et passé ez estudes des notaires soubsignez (en blanc) midy, l'an mil six centz dix-sept, le (en blanc) vingt-cinquiesme jour d'avril et ont lesdictes parties signé la minute des presentes demeurée vers Perier, l'un des notaires soubzsignez.
GALLAND BUON.
COTHEREAU [notaire] PERIER [notaire].
Ensuit la coppie et teneur des lettres patentes et privilege de Sa Magesté, mentionnées en la cession et transport ci-devant escrit faict par ledict sieur Galandius audict Buon.
Loys, par la grace de Dieu, roy de France et de Navarre. A nos amez et feaulx (...) salut.
Nostre cher et bien amé Maistre Philippes Gallandius, principal du college de Boncourt, nous a faict dire et remonstrer que feu Pierre de Ronsard, gentilhomme vendomois, ayant de son vivant contracté estroicte amitié avec feu Maistre Jan Gallandius, oncle dudict exposant, lui confia toutes ses oeuvres qu'il tenoit cheres entre tous ses biens et le pria d'avoir esgard et soing sur l'impression d'icelles, ce que, desirant effectuer, ledict Gallandius, et pour obvier à ce qu'on ne peust par succession de temps tronquer, mutiller ou faire couler en icelles quelques pieces qui ne fussent dudict autheur, il obtint lettres patentes de permission et privilege perpetuel du feu roy Henry troisiesme, depuis confirmées par autres lettres de nostre très honoré seigneur et pere Henry le Grand (que Dieu absolve) verifiées en nostre cour de parlement, par lesquelles il luy fut permis à tousjours de faire imprimer par tel libraire et imprimeur qu'il aura eslu et choisy lesdictes Oeuvres de Ronsard, (...)
Informations concernant le classement et la cotation du document :
Voir une description plus complète de l'acte sur l'instrument de recherche imprimé en ligne (rubrique 'Autres instruments de recherche').
Origine de l'information :
Documents du Minutier central des notaires de Paris, Ronsard et ses amis [288 actes], par Madeleine Jurgens, à partir des dépouillements de Xenia Pamfilova, Paris, Archives nationales, 1985, p. 121, notice n° 32 (instrument de recherche imprimé dématérialisé, certaines notices sont plus détaillées dans la version intégrale accessible en ligne par la rubrique 'Autres instruments de recherche', voir contexte dans le Plan d’orientation général - Notaires de Paris, guides thématiques du Minutier).
Date de révision : 2011
Date de création de la notice : 2009
Marché pour l'impression des oeuvres de Ronsard par Nicolas Buon.
blank nodes
Ronsard, Pierre de